見到呀邊個寫左篇文關於旅行嘅，我又想寫番篇，既然係隨意嘅就梗係廣東話啦。
唔計細個3歲嘅時候去左泰國但係我咩都唔記得嗰種旅行，我第一次有「去旅行」感覺嘅旅行應該係中1/2全班人一齊去澳門同杭州嘅學校旅行。嗰兩次嘅目的地其實一啲都唔重要，我地都係一班熟人一齊玩 Mario Cart，去到大陸1 咪又係講廣東話，咁其實去澳門定杭州定新加坡定台灣都係差唔多，呢d旅行到底係爲左咩而旅行呢？我覺得係爲娛樂，又或者想增進友誼啦。
咁之後中4（好似係）嘅時候去左廣西做義工，又係同學校班人去。成個星期係同一個地方度住，幫公公婆婆修葺下啲野，整下門牌咁。 其實我而家諗返都覺得好似咩都無幫到手咁。 期間好多機會同公公婆婆傾計，講下最近好熱呀、啲野煮得好唔好味呀、啲雞跑得好快呀、食剩啲野扔落池塘度啲魚就會搞掂佢呀、呀邊個公公以前打仗好勁呀（識得猴子偷桃！）。生活同香港當然好大分別啦，間房無冷氣機但係有大蜘蛛，夜晚見到好多星星，出去買餸突然間去左城市咁。你問我學到啲咩呢，其實又無咩大道理，只不過係知道左有一種咁嘅生活，叫做體驗過佢地係點過日子，而又真係幾開心下。
玩得 Twitter 耐就自然會識到好多唔同地方嘅人，而佢地黎香港嘅時候我當然會盡地主之誼帶佢地周圍玩。有啲朋友會想去啲出名嘅地方，影相食飯咁，咁當然無問題啦。但係比較麻煩嘅係有朋友同我講「帶我去啲你覺得正嘅地方」。其實對我黎講茶餐廳真係好正，求求其其有D肉有D菜蛋白質澱粉質撈撈埋埋打個白汁茄汁黑椒汁咁撐得你懵口懵面咪Lui返去返工返學返廠返寫字樓囉，咁但係山長水遠黎到香港唔係食頹飯掛！
之後我就帶佢地飲茶啦，煲仔飯啦，女人街呀，之後天星小輪咁。之後就開始發現其實佢地睇咩都咁開心，去邊都咁開心，就算去食明將一樣咁開心。大佬，日本邊有咁正嘅壽司！有次有班日本大學生黎香港，佢一見面就係
屌你老母
佢話佢好鍾意粗口，之後我帶佢地坐紅van，同佢講呢架野係香港版嘅 AE86，旁邊架的士行大老山隧道，我地就行時光隧道，不知幾開心。
有位從新加坡黎嘅朋友，同佢求其上左架電車，一邊吹水一邊周圍望，其實已經好正。仲有一位從台灣黎嘅朋友，佢話其實過黎係爲左吹下水咁，於是就係 cafe 吹左成個下晝，之後搵附近嘅朋友食飯。佢地無去迪士尼、天壇大佛、山頂，但係我覺得我介紹左一個我眼中嘅香港俾佢地。我唔知對佢地黎講香港係一個點嘅地方，不過佢係度過嘅一個下晝，同普通香港人唔係差好遠，至少同我唔係差好遠。
就好似我會想同外國朋友介紹我眼中嘅香港一樣，我覺得我去到外地應該要嘗試了解本地文化，爲左體驗當地人嘅生活而去旅行。
去 San Francisco 嘅時候好印象深刻嘅係，我住嗰間酒店出面經常有架 Lincoln town car，仲要係 limo，但係附近就經常有 homeless 係度遊蕩，過幾條街d玻璃窗全部有鐵欄保護。係一種唔使講出口都 feel 到嘅貧富懸殊嘅感覺。係 Subway 買早餐時有個呀婆問我有無散紙，我就將買麪包找返黎嘅錢俾佢啦，但係望到佢身後面就係一間高級酒店嘅時候…我到而家都唔知點形容嗰仲無奈嘅感覺，就算我俾錢佢買早餐又點呢？我無幾耐就要返日本，佢身後面嗰班幫到佢嘅有錢人我估都唔會理佢架啦。去 bar 同其他住係度嘅 programmer 吹水時，佢地好少提及呢個問題，反而就經常強調 SF 真係一個好地方啊，呢度啲人好正呀，創業有幾爽咁，唔知係睇唔到定扮睇唔到呢？之後坐的士嘅時候個司機同我講，SF 因爲好多技術公司進駐，樓價升高左好多好多，原本住係度嘅人根本承受唔到呢個物價，但係又無計。而且入黎嗰班係有錢人，普通百姓好難抗爭，打官司又無錢。其實我都唔知詳細究竟係點，不過就覺得同香港好多人黎炒樓有啲似。我係香港就當然知道香港發生緊咩事啦，但我黎 SF 之前，對我黎講呢度就係一個聚集晒頂級科技公司嘅地方，就係咁咋嘛，我根本唔知道原來背後有咁嘅問題。有黎呢度實在太好了，可以用自己對眼睇清楚呢度係一個點嘅地方。
我第一次去日本嘅時候係中4暑假，嗰陣唔識日文，只係周圍行周圍影相就已經好開心。不過有個好重要嘅一點就係可以離開香港。就好似放學就算無原因都唔會想直接返屋企一樣，其實想脫離一下日常都好正常。爲左可以完全脫離，我成個旅程自費（中4咋大佬！），咁就可以避免家人阻止我啦。玩，梗係開心，日本治安又好，而且日本人基本上好有禮貌，問路一定有人答，大家都好nice。對於中4嘅我黎講簡直係天堂啦。如果要我搵個地方逃離日常嘅話我覺得日本一定係好地方。
直到我有份日本嘅工作爲止。
拿即係咁，當你逃離得太多日常，佢就變成你嘅日常，咁你咪又係無法逃離日常…
本当に日常から脱却したければ――常に進化を続けるしかないんだよ目指すものが上だろうが下だろうがね
– 折原臨也
其實我的確試過因爲唔想返屋企但係宿舍又無開門所以走左去日本，打算逃離日常。不過嗰陣我先發覺對於我黎講，日本已經再唔係一個逃避現實嘅目的地…
係日本做野耐左，好多野都習慣左。
我roommate去日本旅行剩係去神社拜神就已經好興奮，其實真係有d羨慕。
店員對你有禮貌就當然爽，但如果你係日本打工，你要對所有顧客有禮貌呢？
有啲外國人會覺得幾得意嘅日本文化，比如話店員同店員講野嘅字眼，同顧客講野嘅字眼，同上司講野嘅用詞都全部唔一樣咁，就係佢地重視表達尊敬、誠意嘅表現。你睇就得意，到你要講嘅時候就麻煩啦！香港人就算對唔同人有唔同嘅語氣，都好少會改變用詞。但日文複雜好多，只係自稱「我」，常用嘅都至少有「俺」、「僕」、「自分」3個唔同嘅字，唔係常用嘅更加多，仲有各種敬語都好麻煩。用錯嘅話輕則尷尬，重則無禮。
咁我講過我會嘗試體驗一個地方嘅文化，融入佢地嘛，於是就跟佢地規矩做野啦。結果就係唔少反感嘅事情。
係日本，加班好平常。工作到尾班車變成左一件理所當然嘅事，最大鑊嘅係佢地認爲加班=努力=好事。曾經有人用好自豪嘅表情同我講佢3日無訓過，雖然佢自豪，但我覺得佢各種意義上好慘囉。
仲有佢地怕英文，呢個其實好多人都知，但去到工作嘅時候你唔多唔少都會希望佢識英文。比如話有d問題用英文 google 一下就會出答案，用日文 google 係搵唔到嘅，又或者難搵好多。又比如我試過send一篇英文 document 俾同事，佢會搵份唔知邊個譯嘅舊版日文 document 黎睇，因爲佢唔想睇英文。
理所當然地，日本唔係我中學時幻想過嘅天堂。 以前我可能會話我鍾意日本，而家我真係唔係好肯定。
咁當然啦，每個地方都有好有壞，而隔離飯總係香啲嘅。係你未充分了解一個地方之前，佢都可能係一個逃避現實嘅好地方啦。不過我嘅話就情願了解完之後討厭一個地方/文化，都唔想自欺欺人繼續覺得嗰度係天堂。因爲我去旅行係爲左體驗嗰度嘅生活，而唔係爲左唔體驗我原本嘅生活。
回應返呀邊個：我都同意「旅行係從現實中撤退」呢個講法，不過呢個只不過係逃避現實，你去到一個正嘅地方，之所以覺得正，係因爲你仲未睇到佢有幾差，又或者你唔肯正視。
唔知點解講到去大陸嘅時候好常用「返大陸」呢個講法，但係我一黎無歸屬感二黎其實都唔係去過好多次，所以用「去大陸」好似比較好？↩